Litratong Pinyo: Batik/Mantsa

.

Litratong Pinoy Entry
.

.
Isang magandang araw po ng Huwebes muli... Sa ngayon ang aking maibabahagi sa themag Batik/Mantsa ay ang aking isa sa alagang Guppy.

Ang mga batik sa bahagi ng kanyang buntot at palikpik ay nakaka-akit at nagbibigay din nang kanyang pagkakakilanlan sa mga kauri niyang guppy...

Litratong Pinoy: Iyo (yours)

Litratong Pinoy Entry

.

Magandang araw po ng Huwebes sa lahat... Ang thema sa araw na ito ay "IYO"... Ang aking maibabahaging litrato ay ang isdang ito...

Habang nagiikot kasi ako noon ay nakakita ako ng isang aquarium may kamurahan at kagandahan kung kaya't napabili ako upang ilipat na ang aking mga gold fish at guppies... kinabukasan ay dinala ko ang mga naging anak nila Dwarfen at Traxex (Dwarf Hamster) sa pet shop upang maibenta... Habang ako ay nagmamasid may mga fighting fish na umagaw ng aking atensyon at napagmasdan ang kanilang magaganda at matitingkad na kulay... Siguro ay inakala ng mayari ng Petshop na gusto ko ito kung kayat nasabi niyang "If you want take it... it's your's for free"... Aba! Di na ako tumanggi, free weh! Hehehehehehe...

Litratong Pinoy: Akin (mine)

Litratong Pinoy Entry

Akin!?! Ano nga ba ito? Akin ba o ina-angkin? Para sa akin, inilahok ko ang kuha kong ito na makikita ang bulaklak na tila nabubukod tangi sa mga katulad niya... Magkakahawig man sila pero may kanya-kanya siguro silang katangian at kung kaya't sa dinadami ng gaya niya ay sa bulaklak na ito nabaling ang aking atensyon kung kaya siguro doon ko nabigyang pansin at ituon ang lente ng aking camera at bigyang pansin ang para sa akin ay kakaibang katangian nito...

LP 35: Ang Pagwawagi!

Paano nga ba ang mag-wagi o maging isang wagi? Kapansin-pansin sa aking inilakip na litrato ang kaka-ibang kulay ng isang itlog na maaring kumukuha ng iyong atensyon sa ngayon habang pinagmamasdan mo ito, dahil sa kanyang kaka-ibang kulay ay mas nagiging kapuna-puna... Maaring ang dating sa iba ay may kagandahan at maari rin naman ordinaryo lamang, pero paano naman kaya kung ang naging kulay ng itlog na ito ay itim? Siguro ay ma-iisip mo na parang naihantulad siya sa isang itim na tupa, na may hindi magandang impresyon... May nakakapag-isip din siguro na maaring maganda ang kanyang kulay sa iba pero ang nasa loob pala ay bulok na...

Sa ating pamumuhay, marami tayong nakakahalubilong iba't-ibang klaseng tao, iba-ibang pag-uugali at iba-ibang paniniwala... Napapansin natin ang kakaibang katangian nila at kung minsan ay mas napupuna pa natin ang pintas o mga maling nagagawa nila, kaysa sa kung ano ang kabutihan at kagandahan ng kanilang nagagawa o naibibigay... Siguro ay dahil sa kung minsan ay hinde natin nabibigyang halaga ang kanilang kagandahan o ang kabutihang naibabahagi sa lahat, na dapat ay atin din bigyang halaga at pasasalamat... Pero may mga tao din na tahimik lamang at inu-una pa ang kapakanan ng iba kaysa sa kanyang sarili, na mas ginugusto pang maging maligaya ang iba... May kanya-kanya talagang pamamaraan para ikaw ay magwagi, maaring madalas kang matalo sa laban, ngunit kapag ikaw ay nag-wagi na, ay may labis namang kasiyahan ang dulot... Maari din namang nag-wagi ka ngunit may kapalit namang mahahalagang bagay na kinakailangan mong isakripisyo...

Para sa akin, kung saan ka masaya at kung ano ang gusto mo ay yun ang gawin mo, hangga't wala kang ginagawang masama o hinde ka nakakapinsala at alam mong wala kang inaagrabyado, maaring nasa tamang lugar ka... Pilitin mong maabot ang mga gusto mo at sa oras na makuha mo ang iyong minimithi kahit sa simpleng bagay ay may labis kang kasiyahan na madarama at maari mong sabihin na ikaw ay nag-wagi...

LP 31: Kadiliman

Isang magandang araw ng Huwebes ang aking pagbati... Ano nga ba ang minsan mayroon sa kadiliman? Minsan, ito ay kinakatakutan at kuminsan naman ay kina-aaliwan... Sa thema ngayon ay tila yata napapanahon sa papalapit na araw ng mga patay, kung kaya ay ito ang larawan na ito ang aking inilakip...

Hindi ba at kay kagandang tignan ang paligid sa gabi kapag kabilugan nang buwan? Ang iba ay nagtatakutan, ang iba ay naglalaro ng taguan at ang iba naman ay naglalambingan...

Dito sa gitnang silangan kung saan ako'y kasalukuyang naroon, may kahirapan ang maglakad sa kadiliman... Walang kasiguraduhan ang iyong kaligtasan at di mo alam kung mayroon bang panganib na naghihintay kung kaya't hinde mo na pipiliin pang dumaan at maglakad sa dilim... Siguro naman ay kahit saang lugar lalo na at kung ikaw ay isang dayuhan sa ibang bayan ay talgang nakakatakot lumakbay sa kawalan... Hindi mo alam kung ano ang mayroon at tila ba isa kang bulag na mangangapa sa dilim...

LP 30: LIWANAG

Pagkatapos nang Apat na buwan... Ang inyo pong lingkod ay susubukang sumali at makibahagi sa sining nang photographiya... Medyo may katagalan ang aking pananahimik at pagkawalan dito... Matagal-tagal ko rin hinde na bigyang pansin ang aking blog at marami-rami rin akong napabayaang aktibidades... Paumanhin po sa lahat at hiling ko sa inyo ang inyong mumunting pang unawa...

Sa aking muling pagsali at pagbabahagi... Lalo na sa thema ngayon na may pinamagatang LIWANAG... Para sa akin ay ito ang larawan aking maibabagagi at makakapag bigay expresyon nang aking nais sabihin...

Salitang LIWANAG... Maraming kahulugan at mraming ipinapahayag... Sa ngayon ang dating sa akin nang salitang LIWANAG ay aking maikukumpara sa pang araw-araw na pamumuhay... Lalo na sa ngayon na kay raming problema na ating hinaharap...

Inilakip ko ang larawan na ito upang magbigay simbolo sa lahat na sa bawat araw na darating sa ating buhay ay may panibagong pagkakataon at Liwanag na magbibigay pag-asa... Pag-asa na upang tayo at magbago... magsumikap... at magkaroon nang panibagong pagkakataon at pag-asa na magkaroon nang magandang kinabukasan...

Hinde natatapos ang lahat dahil sa isang kasawian O di kaya pagsaubok sa ating buhay... Isipin natin na sa bawat pag sikat nang haring araw sa panibagong araw ay mayroon tayong pag-asa at pagkakataon...

LP #11: Kalayaan

Bago po ang lahat... Isang magandang araw po ulit nang Huwebes ang aking pag-bati sa inyo... Sa ngayon linggong pong ito ang ating tema ay Kalyaan... Maraming naghahangad ng kalayayaan... Maging sa malaki o maliit na bagay ay maraming dahilan na humihingi ng kalayaan...

Sa kadahilanan pong wala akong gaanong mailathala tungkol sa kalayaan at dahil narin sa gusto kong matapos agad itong akda na ito, ako po ay humingi ng opinyon ng iba... Hindi po ito tungkol sa kalayaan ng ating bansa... Ang aking maibabahagi po sa ngayon ay tungkol sa isang tao na aking nakilala kama kailan lamang na tila nahulog ang aking kalooban...

Tawagin nalang natin sya sa kanyang initial na R.R.P. At ito po ang kanyang nasabi...

"Hindi makakamtan ng isang tao ang tunay na kalayaan na gusto niya habang my sakit at hinanakit at galit na nararamdaman sa puso ng isang tao... Kailangan ng isang tao na nakakulong sa rehas ang kapatawaran sa kanyang puso para makamtan niya ang kalayaan na hinhanap niya... Hinahanap ng tao na nakakulong sa rehas ang kapatawaran ng mga taong ngbigay sa kanya ng sakit... Kung sakaling dumating yung hinihingi ng kanyang kapatawran masasabi kong maari ng mkalaya ang buong pagkatao at ang kanyang puso..."

Medyo tungkol sa karaniwang pananaw ang kanyang nasabi, may kaguluhan ngunit kung iyong iintindihin ay may kahulugan... Sya ang aking hiningan ng opinyon sa kadahilanang marami akong istoryang nalaman tungkol sa kanyang buhay, mga hirap at pasakit na pinagdaanan maging pisikal o kaya ay mapa-emosyonal, mula pa sa kanyang pagkabata at hanggang sa ngayon... Hindi ko lubos maisip na sadya palang may mga taong malulupit, kahit na sa sarili mong magulang pala ay maari mong danasin ang lupit at sakripisyong sadyang hindi mo gugustuhin... Maging sa mga kanyang minahal sa buhay ay dinanas nya ang mga kalupitan na hindi mo aakalaing magagawa ng isa mong minamahal...

Ang akala ko noong una ay sa komiks lang nangyayari ang mga ganong bagay, may mga nangyayari din palang ganoon sa totoong buhay... Kung kaya't kapag nakikinig ako sa mga bawat malulungkot na istoryang kanyang naranasan, may matinding galit at lungkot din ang aking nararamdaman... Paano kaya makakalaya ang isang tulad niya sa mga malulupit at malulungkot na ala-alang ibinigay sa kanya... Kung may magagawa lang akong paraan upang maipsan ang kanyang mapupoot na ala-ala... Sanay aking magawa kahit sa pinaka simpleng paraan... Hiling ko lang na sana nga ay makatulong ako sa kanya...

LP#10 Pag-iisang Dibdib

Tila po napahinga ako sa aking pag-gawa nang aking blog at bibihira ko na itong nabibisita... gayunpaman, kahit paminsan-minsan ay dapat at kinakailangan nga namang i-update...

Atin pong ibalik ang kwento sa tamang tema... Sa linggong ito ay kay ganda at sagradong tema ang mapag-uusapan... Napapanahon nga naman ng mga pag-iisang dibdib, sadya po yatang kapag buwan ng Hunyo ay kay raming nakikipag-isang dibdib... Dalawang pusong nagmamahalan at nagsusumpaan sa harap nang altar...

Sa ngayon... Ito po ang aking maibabahagi... Hindi ko man nasaksihan ang pag-iisang dibdib nilang dalawa, masasabi ko naman na meron kaming alala-alang maibabahagi sa kanila... At ito po ang ilan sa mga iyon...

Yan po lamang ang ilan sa aking maibabahagi... Hiling ko na sana ay maging mas matibay ang kanilang pagsasama at maging masagana ang kanilang pamilya...

LP# 8 TUBIG

Ang bilis ng mga nagdaang araw... Tila di ko napansin na ngayon ay araw na naman pala ng Huwebes. Kahit medyo abala, nais kong ipaskil ito upang makalahok ulit sa Litratong Pinoy... Ang tema naman po sa ngayon ay Tubig... Ang isa sa may pinaka importanteng bahagi na bumubuo sa mundo, hayop, halaman at sang katauhan... Halos 71% ng mundo ay binubuo ng katubigan at gayon din sa kabuuan nang mga likhang namumuhay dito...

Tubig...

Ang susunod pong mga kuha ay noong nakaraang taon pa (2007) nang kami ni master ay pumasyal sa lugar nila Pareng Tirso sa Antipolo.... Halos mahigit tatlong oras namin tinawid ang dalawang bundok sa kahahanap lamang ng talon... Sa kasawiang palad, hindi namin ito natunton sa kadahilanang aabutan na kami ng takip silim at nakalimutan din naming mag-baon ng tubig na pamatid uhaw sa aming paglalakbay... Kasalanan ito noong Ale sa may Hanging Bridge.... Ang sabi malapit lang daw! Eh, Dalawang bundok na ang aming natawid, wala parin ang talon... Hanggang sa lumabas na kami sa isang bayang patungong Montalban at pabalik ng Marikina...

Si master habang hingal na hingal at naghuhugas sa dumadaloy na tubig mula sa Bundok... Kailan kaya mauulit ang ganitong paglalakbay? Sa susunod ay amin nang sisiguraduhing may dala-dala kaming pamatid uhaw....

LP #7: Umaapoy

Magandang araw po ulit nang Huwebes sa lahat... Araw na naman nang paglahok sa Litratong Pinoy... At sa Linggong ito ang tema ay tungkol sa mga Umaapoy... Medyo madali-dali ang aking paglahok sa ngayon sa kadahilanang may mga likhang kuha narin ako ng mga ganitong nilalarawan... Ang iba ay noong nakaraang taon pa at ang iba naman ay nito lamang mga nakalipas na araw...

Ito po ang ilan sa aking mga napiling ilahok sa ngayong tema...

Laro sa Baga

Hindi po ito yung inyong nababasa sa Liwayway, pinangalanan ko po lamang syang Laro sa Bagos sa kadahilanang tila mo naglalaro ang apoy na ito sa ibabaw nang nagbabagang uling...

Ilaw at Apoy

Ito naman po ay ang aking kuha noong nakaraang undas at ako ay nage-eksperimento at sabay na nilalaro ang maliit na ilaw sa likuran nang nag-aapoy na kandila... Medyo hindi lang po gaanong maganda ang pagkakaguhit ng ilaw, ngunit gayon pa man ay nagbigay parin ito nang karagdagang konsepto...

Pang-Gatong

Ang kuha naman na ito ay noong huli kong bakasyon, habang inaantala ni Nanay ang mga balat ng baboy upang gawin sitsaron... Ito ay katam-tamang baga lamang ang kinakailangan upang hindi mabigla ang pagkaka-antala nang mga balat at upang hindi rin masunog ang mga ito... Kapansin-pansin din sa larawan ang mga abong papel na ginamit upang pag-apuyin ang kahoy na ipinang gatong... Ito pa yata yung listahan nang aking mga pinagkakautangan...

LP #5 : MALUNGKOT

Araw na naman po nang Huwebes at syempre araw na naman nang paglahok sa Litratong Pinoy Medyo may kalungkutan nga lang ito sa ngayon sa kadahilanang ang tema ngayon tungkol sa malungkot... Medyo hirap akong pumili nang litratong aking ilalahok sa kadahilanang wala naman po akong gaanong kuha na nagpapahiwatig nang kalungkutan... Sana ay magustuhan ninyo itong aking mga inilakip na litrato...

Kandila

Ito po ay kinuhanan ko noong nakaraang undas... Datapwat naririto kami sa ibang bansa, ipinagtitirik parin namin ang aming mga mahal sa buhay na namayapa...

Drama

Ito naman po ay kuha ko noong nakaraang taon sa isang pagsasadula na ginanap sa Al-Khobar... Nakalimutan ko na kung bakit siya napapaiyak diyan? Hindi nya kasi malaman kung sino ang uminom nang tubig sa basong pinaglalagyan nya nang pustiso... (Biro lang po!) :D

Lumbay

Ito naman po ay kuha ko noong nakarang taon din sa pag-gunita nang All Filipino Community Day... Tila malayo ang tingin at iniisip ang kanyang pamilya na kanyang labis na hinahanap-hanap... Hirap nga naman kapag ikaw ay nangimabang bayan at ang mga iyong mahal ay iniiwan panamantala at wala sa piling mo.... Sadyang hindi mo minsan maiiwasan ang malumbay at mangulila...

LP #4 Hugis ay Pahaba

Ang aking pong isasali ngayon sa Litratong Pinoy na ang kategoya ay tungkol naman sa mga bagay-bagay na pahaba… Sa pagkakataong ito ang akin pong ibabahagi ay ang mga sumusunod…

Kutsara at Chopsticks

Ito po ay kuha sa isang restaurant dito sa Gitnang Silangan na kung saan paminsan-minsan ay aming pinupuntahan upang magkaroon ng pagtitipon…

Antenna ng Television

Ang aktwal ko pong kinukuhanan dito ay ang mga grupo ng mga ibong nasa kabilang bakod nang aming tinutuluyan… Sa kadahilanang ang thema ngayong lingo ay tugkol sa mga bagay na pahaba, akin pong napuna ang antenna dito kung kaya’t isa ito sa aking isinali…

Fuse

At ang huli ko pong ibabahagi ay ang aking pagkakakuha sa isang maliit na pundidong fuse na gamit sa speaker… Ito po ay napundi sa kadahilanang hindi sinasadyang pagsaksak sa 220 boltaheng kuryente nang aking kasambahay…

Litratong Pinoy #2: Tatlo ang sulok ko

Ito ang aking unang pagsali sa kasiyahan nang blog na ito... At sadya ngang nakaka-guluhanan ang unang paglahok ko dito... Noong nabasa ko ang site na ito na nakapaskil sa blog ni masterbetong ay dali-dali kong inalam kung paano sumali... Pagkatapos kong alamin ang kanilang mga alintuntunin ay dali-dali kong kinuha ang aking kamera at naghagilap nang kung ano-anong bagay na may hugis tatsulok, at ito ang ilan sa aking mga napagkatuwaang kuhanan...

Ito ay ang tatak nang zune na gawa ng microsft... Ito pa ay kuha sa kable ng charger kung kaya't kapansin-pansin po mga gas-gas nito...

Napansin ko rin ang hugis na tatsulok dito sa aking laruang Hot Wheels kaya nagustuhan ko rin kuhanan upang maisali ko rin...

At ang huli ko pong ibabahagi ay ang hugis tatsulok na napansin ko sa likod nang baryang sampung piso... Medyo binago ko po ang kulay upang bigyang pansin ang hugis tatsulok...

Litratong Pinoy

Kani-kanina lang habang binisita ko ang blog ni masterbetong, aking nakita ang kasalukuyang naka-paskil na pinamagatang Bilog... Ang una ko munang napansin ay ang kanyang litratong inilakip dito... Habang ito ay aking binabasa, ito pala ay kanyang inilahok sa Litratong Pinoy na ang katigorya ay tungkol sa hugis bilog.

.

Sinulyapan ko ang blog na ito at aking napag-alaman na isa pala itong blog para sa mga Filipinong nahihilig sa potograpiya, mapa-propesyonal o hindi man, ay maaring sumali... Ito ang link sa kanilang impormasyon kung paano sumali... (Impormasyon atbp.)

.

Kaya pagkatapos kong alamin ang mga patungkol dito at napag-alaman ko rin na ang susunod na kasiyahan ay may themang Litratong Pinoy #2: Tatlo ang sulok ko ay dali-dali kong kinuha ang aking kamera at naghanap naman ng mga bagay o kung ano-anong pwedeng kuhanan na may hugis tatsulok upang makilahok sa kanilang kasiyahan...

.

Ang mga litratong aking isasali dito ay akin naman ibubukod na post para ipasa at isali ang link sa Litratong Pinoy at sana naman ay tanggapin at aprobahan ng Admin.